தூசடைந்த அட்டைப் பெட்டிக்குள்
கிழிந்துபோன புத்தகத்தில்
பக்கத்திற்கு ஒன்றாய்
எதிரெதிராக சமமற்றுப்
பிரிந்து கிடந்தது
22 அங்குல புஜமும்
57 அங்குல பரந்த மார்பும்
கொண்டவனின் உடல்
டாவின்சிக்கும் ஃபிபொனாச்சிக்கும்
சவால் விட்டபடி.
யாருங்கப்பா இது என்று கேட்ட
ஐந்து வயது மகனுக்கு
முஷ்டி மடக்கி புஜபலம் காட்டி
நின்றவாறே செல்கிறான்
அர்னால்ட் ஸ்வார்சுநேகர்.
குட்டி பனியனைக் கழட்டிவிட்டு
குட்டிக் கைகளை மடக்கி
குட்டிக் குட்டியான
புஜங்களைக் காட்டி
நானும் தான்
அர்னால்டு சூப்
அர்னால்டு சாக்லேட்
அர்னால்டு பன்
அர்னால்டு கேக்
என முழுப் பெயரை
வகை வகையாக
மழலைக்குள் இழுத்துச் சென்ற
பாலகனைப் பார்த்து
அர்னால்டு சூப் என்ற
அர்னால்டு சாக்லேட் என்ற
அர்னால்டு ஸ்வார்சுநேகர்
புஜங்கள் தளர்ந்து
முகம் மலரச் சொன்னார்
I am Back.
No comments:
Post a Comment